Կազմակերպութեամբ «Ազդակ» օրաթերթին, շաբաթ, 21 նոյեմբեր 2009-ին, երեկոյեան ժամը 7։30-ին, ՀՅԴ «Շաղզոյեան» կեդրոնին մէջ տեղի ունեցաւ «Ազդակ»ի «Փիւնիկ» սրահի բացման հանդիսութիւնը՝ ներկայութեամբ հոգեւոր պետերու, ՀՅԴ Բիւրոյի անդամներու, ՀՅԴ միջին արեւելեան կազմակերպական շրջաններու Կեդրոնական կոմիտէներու ներկայացուցիչներու, Հայաստանի Հանրապետութեան դեսպանատան ներկայացուցչութեան, լիբանանահայ պետական գործիչներու, «Փիւնիկ» հիմնադրամի ղեկավարներուն, Հիւսիսային Ամերիկայի ազգային իշխանութիւններու անդամներուն եւ գաղութին մէջ գործող յարանուանական, հասարակական ու միութենական կազմակերպութիւններու, պատասխանատուներու, արուեստագէտներու, ինչպէս նաեւ լիբանանահայ լրատուամիջոցներու ներկայացուցիչներու։
Բացման հանդիսութեան պաշտօնական արարողութենէն՝ ժապաւէնի հատումէն ետք, հանդիսութեան բացման խօսքը արտասանեց Նարէ Գալեմքերեան, որ նշեց, թէ «Ազդակ»ը առանց իր որակէն զիջելու 82-ամեայ կորովով եւ միշտ երիտասարդական թափով շարունակեց ու կը շարունակէ իր ստանձնած առաքելութիւնը։ Ան ըսաւ, թէ նորօրեայ զարգացումներով «Ազդակ»ի խօսքը երկվայրկեանական արագութեամբ կը ճեղքէ տեղական սահմանները եւ կը տարածուի աշխարհով մէկ՝ կենսական ու սնուցիչ կապ հաստատելով համայն հայութեան հետ։ Նարէ Գալեմքերեան հաստատեց, թէ նորակառոյց սրահին մէջ ծաւալելիք գործունէութեան արգասիքը մեծ ու արժէքաւոր պիտի ըլլայ եւ պիտի գայ համալրելու մեր մամուլի աշխատանքը։
Ան շնորհակալութիւն յայտնեց «Փիւնիկ» հիմնադրամին, ինչպէս նաեւ այս ծրագրին աջակցած ճարտարագէտ Հանրի Սիսլեանին, տէր եւ տիկին Կարպիս եւ Լիւսի Թիւթիւնճեաններուն, արուեստագէտ Արա Ազատին եւ արուեստաբան դոկտ. Մովսէս Հերկելեանին։
Ապա խօսք առաւ «Ազդակ» օրաթերթի տնօրէն եւ գլխաւոր խմբագիր Շահան Գանտահարեան։ Ան հաստատեց, թէ «Ազդակ» համոզուած է, որ բոլոր մակարդակներուն վրայ համախմբուածութիւնը կը գօտեպնդէ մեզ, կը նպատակաուղղէ մեր աշխատանքները, կ'ընդլայնէ մեր մտահորիզոնը եւ կ'արդիւնաւորէ մեր հաւաքական ճիգերը։ Գանտահարեան աւելցուց, թէ «Փիւնիկ» սրահը կ'ընձեռէ այս առաջադրանքին լիարժէք ընդառաջ երթալու նկատառելի հնարաւորութիւններ։
Ան ըսաւ, թէ «Փիւնիկ» սրահին մէջ կազմակերպուելիք քննարկումներուն կողք-կողքի պիտի ըլլան գաղութի, սփիւռքի եւ հայրենի լրատուադաշտի գործիչները, արուեստագէտ հասարակութիւնը եւ երիտասարդութիւնը՝ միասին քննարկելու համար բոլորին վերաբերող խնդիրները։ Շահան Գանտահարեան յատուկ շնորհակալութիւն յայտնեց «Փիւնիկ» հիմնադրամին եւ անոր նախագահ տէր եւ տիկին Գափրիէլ եւ տոքթ. Անժել Չեմպերճեանին եւ հիմնադրամի հոգաբարձուներու խորհուրդի նախագահ դոկտ. Լեւոն Սարգսեանին։
Շահան Գանտահարեան յայտնեց, որ «Ազդակ»ի հիմնադիր՝ Հայկ Պալեանի «Ազդակ»ի հրատարակութեան ձեռնարկելէն առաջ լոյս կը տեսնէր եռօրեայ թերթ, որուն անունն էր «Փիւնիկ»։ Ան աւելցուց. «Գեղեցիկ զուգադիպութեամբ մը՝ շուրջ 85 տարի ետք, «Ազդակ»ի նախահայր «Փիւնիկ»ը վերստին յարութիւն կ'առնէ մոխիրներէն եւ «Ազդակ»ի կողքին կը կանգնի յաղթական նոր սլացքներ եւ թռիչքներ ճախրելու վճռակամութեամբ»։
Լիբանանի մէջ Հայաստանի արտակարգ եւ լիազօր դեսպան Աշոտ Քոչարեան խօսք առնելով յայտնեց, թէ ուրախալի տօնակատարութիւն մըն է այս հանդիսութիւնը, որ իրականացաւ շնորհիւ բարերարներու մեծ նուիրատուութեան։ Ան հաստատեց, թէ ինք համոզուած է, որ այս սրահը կը նպաստէ Հայաստան-սփիւռք յարաբերութիւններու ամրապնդման եւ գործնականացման։ «Փիւնիկ» հիմնադրամի հոգաբարձուներու խորհուրդի նախագահ Լեւոն Սարգսեան խորհուրդին անունով շնորհաւորեց «Ազդակ» օրաթերթը՝ շեշտելով, թէ «Ազդակ»ը սփիւռքի մէջ երկար տարիներ ծառայած է հայապահպանման եւ սերունդներու դաստիարակութեան գործին մէջ։ Ան մաղթեց, որ հնարաւորութիւններ ստեղծուին, որպէսզի «Ազդակ»ի տպագիր տարբերակը հասանելի ըլլայ նաեւ հայրենիքի հայութեան։ Լեւոն Սարգսեան յայտնեց իր համոզմունքը, որ Փիւնիկ սրահը առիթ պիտի ըլլայ քննարկելու Հայաստանի եւ սփիւռքի համագործակցութեան վերաբերող հարցեր։
Լիբանանի հայոց թեմի առաջնորդ Գեղամ եպս. Խաչերեան հաստատեց, թէ «Ազդակ» օրաթերթը վերջին տարիներուն իր գործունէութեամբ ու արհեստագիտական պայմանները լրացնելով դադրած է պարզ օրաթերթ մը ըլլալէ, եւ դարձած հաստատութիւն մը, ուր կ'արծարծուին հայութեան հետ առնչուած բոլոր հարցերը։ Առաջնորդ սրբազանը ըսաւ, թէ «Ազդակ»ը մեր գաղութի հայելին է, որ մեր առօրեան կը ներկայացնէ եւ շրջանցած է բոլոր սահմանները։ Լիբանանի հայոց թեմի առաջնորդը շեշտեց, թէ «Ազդակ»ին նկատմամբ վստահութեան արդիւնք է այս առիթը, որ իրականացաւ շնորհիւ «Փիւնիկ» հիմնադրամի գնահատելի ջանքերուն։
ՀՅԴ Լիբանանի Կեդրոնական կոմիտէի ներկայացուցիչ Յովիկ Մխիթարեան խօսք առնելով, ըսաւ, թէ մամուլը հայ կեանքին հարազատ հայելին է, որ կը ներկայացնէ հայ կեանքի բոլոր իրադարձութիւնները եւ կը հունաւորէ ազգային քաղաքական ուղղուածութիւնը։ Ան յայտնեց, որ «Ազդակ»ը մինչեւ այսօր ունի քաղաքական մտածողութեան ու ազգային գաղափարախօսութեան զարգացման դպրոցի դերակատարութիւն։
Մխիթարեան հաստատեց, թէ «Ազդակ»ը կը լուսաբանէ հայկական կեանքը, գաղութը՝ իր բոլոր հատուածներով եւ հայրենիքը՝ իր դժուարութիւններով ու նուաճումներով։Ան ըսաւ, թէ այսօր աշխատանքներուն ծիրը ընդլայնուած է եւ աւելցած են միջոցները, սակայն գաղափարականութիւնն ու ազգային առաջադրանքներուն նկատմամբ դաշնակցական հաւատարմութիւնը մնացած է միեւնոյնը։ Խօսքի աւարտին Յովիկ Մխիթարեան իր կարգին շնորհակալութիւն յայտնեց «Փիւնիկ» հիմնադրամին։
